|
Deur Wet, Profeten en aander geschriften is ons n bult weerdevols schonken. Om dizze bouken mout men Israël priezen om zien onderricht en wieshaid. Dij ze lezen, mouten nait allenneg zulm inzicht kriegen, mor as lu dij nocht aan studie hebben, ook aandern mit woord en geschrift gerieven. Doarom is mien grootvoader Jezus, dij Wet, Profeten en aander geschriften van ons veurolders grondeg bestudaaierd haar en doar goud in thoesroakt was, der ook tou kommen zulm wat te schrieven doar men wat van leren kon en opsteken. t Was zien bedoulen dat lu dij nocht aan studie hebben, as ze ainmoal vertraauwd mit zien geschrift wazzen, nog meer noar wet leven zollen.
Dat zodounde wor ie nuigd dit geschrift mit goie wil en mit aandacht te lezen en der begrip veur te hebben as ter stokken binnen doar van blieken dut dat wie ze nait goud weergeven hebben, bie ale inzet doar wie vertoalen mit moakt hebben. As men oet t Hebreeuws overzet kin aan betaikenis van t oorspronkelke ja nait haildaal recht doan worden. Der is n hail onderschaaid tussen vertoalen en t oorspronkelke waark, nait allenneg bie dit bouk, mor ook bie Wet zulm, bie Profeten en aander geschriften.
Dou ik in t achtendattegste joar van keunenk Euergetes zien regaaiern, in Egypte wonen ging, kwam ik doar in aanroaken mit veurbeelden van hoge gaistelke ontwikkeln. Ik von t slim neudeg dat ik doar ook wat aan biedroagen zol deur dit bouk ieverg en mit zörg over te zetten. n Haile tied heb ik dag en naacht aanknooid en aal mien kundeghaid inzet om t kloar te kriegen en oet te geven, ook veur lu in aander landen dij nocht aan studie hebben en dij zok in heur haile doun en loaten noar wet richten willen.
Wieshaid van Jezus Sirach 19
01n Doene aarbaider wordt nait riek,
dij t klaaine nait eert, gaait langzoam mor zeker te gronde.
02Wien en vraauwlu brengen verstandege manlu van t rechte pad òf,
dij zok mit poedies ofgeft, wordt aal domdriester.
03Wurms en rötterij wordt boas over hom,
zo'n domdrieste kerel wordt votropt.
04Dij te goud van vertraauw is, is lichtzinneg,
dij zok doar schuldeg aan moakt, dut zokzulm tekòrt.
05Dij nocht het aan t kwoad wordt veroordaild,
dij zok verzet tegen lust zet n kroon op zien levent.
06Dij zien tong in toom holdt, zel zunder roezie leven,
dij n hekel het aan reudeln, vermindert t kwoad.
07Vertel proatjes nooit wieder.
doar zelst gain schoa van hebben.
08Vertel t vrund of vijand nait,
hol t onder pet, behaalve astoe doar schuldeg deur wordst.
09Dij t van die heurt, zel veur die oppazen,
en der komt n tied dat e die hoaten zel.
10 Hestoe wat heurd, neem t mit in t graf,
wees nait benaauwd, der komt die niks van over.
11 n Haalfmaal dij n gerucht vernemt, krigt de vloagen,
zo as n vraauw dij n kind krigt.
12 Zo vaast as n piel in bil zit,
zo vaast zit n gerucht in n haalfmaal.
13 Vroag dien vrund der op noa,
hai het t meschain nait doan.
En as e t aal doan het,
zörg der den veur dat e t nait vannijs dut.
14 Vroag dien vrund der op noa,
hai het t meschain nait zegd.
En as e t aal zegd het,
zörg der den veur dat e t nait vannijs zegt.
15 Vroag dien vrund der op noa,
want der wordt voak reudelt,
leuf nait ales wat ter beweerd wordt.
16 Zunder opzet kinst n fout moaken,
wèl het nog nooit zundegd mit zien tong?
17 Vroag dien vrund der op noa veur dastoe begunst te draaigen,
hol die aan Alderhoogste zien wet.
18 De Heer aanveerden, begunt mit ontzag veur hom,
wieshaid dij van de Heer komt, levert laifde op.
19 Kennes van zien geboden vudt op tou t levent,
dij dut wat hom noar t zin is, zel vruchten plokken van boom van onstaarvelkhaid.
20 Ale wieshaid is ontzag veur de Heer.
Zai holdt in dastoe wet in acht nemst,
en kennes van zien aalmacht hest.
21 n Sloaf dij tegen zien boas zegt:
"Ik zel joen zin nait doun,"
moakt zien broodheer grammiedeg,
ook al dut e t noatied toch.
22 Ervoarenhaid in t kwoad is gain wieshaid,
goddelozen heur road geft gain inzicht.
23 Der bestaait vernufteghaid dij n ofgries is,
en der binnen domme mensken mit mor n beetje inzicht.
24 Beter ain mit n beetje inzicht, mor mit ontzag veur de Heer,
as ain mit n bult inzicht dij tegen wet ingaait.
25 Der is vernufteghaid dij zo verfiend is, dat e onrechtveerdeg wordt,
der binnen lu dij boudel zo te draaien waiten,
dat t recht aan heur kaant staait;
mor der binnen ook wieze lu dij rechtveerdeg oordailen.
26 Der binnen minne lu dij mit neus aan grond en in t swaart lopen,
mor vanbinnen vol list en bedrog zitten.
27 Zonent slagt ogen deel en holdt zok doof,
mor astoe nait oppazen dust, moakt e misbruuk van die.
28 As e nou gain kwoad doun kin,
dut e dat aal, zo gaauw as e kaans krigt.
29 Men ken n mensk aan zien oogopslag,
n verstandeg mensk ken men
aan menaaier woar op hai die aankikt.
30 n Mensk zien klaaier, zien lagen en zien lopen,
loaten zain wèl of e is.
|
|